مغامرات مطبخية (سنة أولى زواج )( كوميدي)

في مرة من ذات المرات رجع زوجي من الصيد ومعاه كيس مجمد وقالي ادفني العصافير دي في الأرز

قلتله نعم؟؟؟؟؟؟؟؟؟؟؟؟؟؟ أنا سمعت عن دفن العصافير في التراب إنما في الأرز دي جديدة خالص

نظر لي شاجبا ومستنكرا ومدينا كعادة شعوبنا العربية وقال لي : يا جاهله داه تعبير مجازي

قلتله مجازي يعني يشير لإيه يا جوزي؟؟؟؟؟؟؟؟؟؟ قالي : يعني تحطيهم في برام ارز دي هدية غالية قوي من عرب الصيد ............اتاري يا صحبة الخير لما زوجي يروح الصيد ويصطاد طبعا بيأجر مكان الصيد ويدفع مبلغ ويقعد يصطاد طيور القمري ...عرب المنطقة بقى بيصطادوا العصافير الغلبانه دي بالشباك وبعدين ينظفوهم ويعملوا وليمة غدا شوي للطيور دي ويقوموا بتجميد بعضها ويهدوها للضيف

شوفوا الكرم !!!!!!!!!!!!!





طبعا كان لازم علشان أدفنها إني استعين بصديق .والصديق داه كان حماتي اللي ادتني الوصفة والحمدلله طلعت حلوة .و إليكم الطريقة


برام الأرز بالعصافير





المقادير
حمام أو دجاج صغير أو عصافير -2 كوب أرز - بصلة صغيرة مبشورة - ملح - فلفل - 2 ملعقة زيت دوار الشمس - 3 أكواب لبن - قشدة اللبن.
حبهان ومستكة وقرفة خشب للسلق او التشويح
الطريقة

1-تسلق الطيور نصف سلق و تقطع و تتبل بالبصل و الملح .في حالة العصافير هي أصغر من اي طير ولا تحتاج للسلق تحتاج فقط للتشويح

2- ينقى الأرز و يغسل و يضاف إليه الملح و الفلفل و الزيت و يقلب .

3-يدهن البرام بالزيت ثم يوضع نصف مقدار الأرز ثم ترص قطع الطيور حسب نوعها ثم يوضع بقية الأرز.

4-يغلي اللبن بالقشدة و يوضع على الأرز و يدخل الفرن.

5- عند جفاف اللبن تهدأ حرارة الفرن و يقدح ملعقة سمن ومستكة و يرش على السطح و يعاد البرام للفرن حتى يتم النضج و يغطى .( ومن الأحلى وضع ملعقة من القشدة بدلا من السمن )

وبالهنا والشفا

بعد زواجي بعدة سنوات يا بنات كان زوجي يذهب للصيد وكانت أمي مسؤولة تنظيف الطير وفي مرة بعدما نظفت سألها زوجي : كان فيه طيرة لونها أصفر صغيرة وسط الطير.فردت امي ببراءة الأطفال وقالت:

آه شكلها عجيب ولونها غريب رميتها

زوجي صرخ وقال رميتي ملكة السمان؟؟؟؟؟؟؟؟؟؟؟؟؟؟؟؟؟؟؟؟؟؟؟

قالته : ملكة إيه؟

قال : دي اسمها ملكة السمان ونادرا ما حد بيصطادها وطعمها أحلى و أطيب من كل الطير اللي باصطاده يوميا

فردت أمي : هي موجوده مرمتهاش في السلة لسه بس انا لقيتها لونها أصفر حسبتها تلفت ...







السمان يا بنات بيقولوا طعمه جميل و أنا باعمله مع البصل والطماطم والفلفل الألوان وملعقة من الطماطم المجففة و ملح وفلفل وقرفة خشب وحبهان مطحزن وقطعة زنجبيل والليمون الاسود و الاصفر و البهارات ..أضع الكل على السمان و أضعهم في صينية على النار مع التقليب البسيط في قليل من زيت دوار الشمس ثو أضع القليل من المياة المغليه حتى يتم السواء وبالهنا والشفا

تعيشي يا شيرينا .على فكرة أمي عملت نفس العملة في زوجي لما جاب لها ارانب ( رمت راس الارنب ) أمي اساسا مش بتاكل الارانب وبتحس انها بتطبخ قطط ...و أفتكر واحنا صغار كنا مسافرين للوالد في مركب للسعودية وكان والدي قبطان فقبطان المركب دي احتفى بينا على مائدته في وجبة العشاء و أول ما حطوا الطعام ماما لقته ارانب راحت شاورت لنا بطرف خفي (متاكلوش ) القبطان شافها وسألها خير؟؟؟؟؟؟ظ قالتله دي ارانب وانا مش باكلها ...قالها حضرتك ماشي انما هم ليه لا ..وصمم نتذوقها وطبعا عجبتنا والحمدلله ...نرجع لزوجي : زوجي من هواة اكل رأس الارنب يختي هو سمع إن الوالده رمت الرؤوس في الباسكيت كان حيغمن عليه من الغيظ بس علشان حماته بقى عدى الدور و لما بقيت باعملها بقى يتريق عليا ويقولي متنسيش تعملي زي مامتك ..هههههههه

اكيد بتعرفي تعملي الارانب يا شيرينا وخاصة بقى لما يتعملوا بانيه بعد السلق بيكونوا يامي