طريقة مامتي في عمل القلب
http://mony-madam-salamony.blogspot.com/2009/08/blog-post.html
الطريقة سهلة جداااا لدرجة انكم مش هتصدقوا
المقادير
قلب و يقطع مكعبات كبيرة
(بتلو بأه و لا أي حاجة)
هتفرق بس في مدة التسوية
بصلة متوسطة
مقطعة مكعبات صغيرة اوي
طماطم متوسطة
مقطعة مكعبات
ملح و فلفل
ندخل علي الطريقة بأه
نحط القلب في حلة و نقطع عليه البصل المكعبات و نحط الملح و الفلفل و نقطع عليهم الطماطم
و نقلب كويس بحيث التتبيلة ديه تدخل في كل حتة في القلب
و نحط عليه ملعقة سمن بلدي كبيرة و نحطه علي النار
و نغطيه
و كل فترة نقلب
بعد ثلث ساعة مثلا هنلاقي القلب استوي و التتبيلة ديه عملت صوص تححححححفة
اغرفيه في طبق بايركس علشان الجمال ده كله يبان
*************************************
ملحوظة و إياكم والضحك
داه كان تعليقي على القلب
كلمات من نور said...
الله عالمدونة دي ..حسستني بالجوع..ممكن أضحكك على موضوع القلب داه؟زمان زمان قوي يعني أيام ما اتجوزت من حوالي 22 سنة ...زوجي جاب قلب ومخ وكبدة وحطيتهم في الفريزر و كنت لسه يادوب سنة أولى زواج ومعايا أبني الكبير بيبي مش بيخليني أنام فكنت أطبخ يادوب قبل موعد وصول زوجي بساعه ودخلت المطبخ ورحت عالقلب المجمد قطعت شرايح شرايح و حطيته عالنار بالتتبيلة والزيت وووو ولقيته شبه القرص قلت انا مالي
هو اللي عايز ياكل قلب
أول ما دخل حطيت القلب في الطبق و أنا أساسا باقول يع أصلي مش من هواة أكل الخروف بمشتقاته المهم الراجل استغرب قالي إيه داه؟ قلتله القلب يا حبيبي ..قالي القلب؟ داه المخ يا أمي ..قلتله بجد؟ داه المخ؟ قالي مش عارفه لون القلب من المخ؟ لون القلب أحمر زي الكبدة مش أبيض..قلتله و أنا إيه عرفني بقى مش يمكن كان خروف قلبه أبيض؟ أنا قلت الكلمة ولقيت الراجل وقع عالأرض من الضحك ..وعنها ورحت النادي يوم الجمعة لقيت موضوع الخروف أبو قلب أبيض حديث المدينة..فضحني الجدع..تحياتي
عدل سابقا من قبل كلمات من نور في الخميس يونيو 10, 2010 10:53 am عدل 1 مرات