تحذير الى كل البنات من النصب
تعرضت انا الى النصب يوم 15 مارس 2010 و قررت ان انشر الموضوع و احذر الناس و ذلك للحد من النصب و محاربة هذا النوع من الكسب
الموضوع كالآتى (باللغة العامية)
الحادثة
كنت سايقة عربيتى (علماn انى بقالى 10 سنين بسوق و ما شاء الله عمرى ما خبط حد) فى شارع جانبى يربط بيت الترام و شارع ابو قير (يعنى شارع ضيق و عرابيات راكنة على الجانبين، يعنى مفيش مجال للسرعة ) و فجأة سمعت صوت هبد فى ظهر العربية، افتكرت ان عربية خبطتنى من ورا ، بصيت فى المرايه ، مفيش عربيات و فجأة لقيت واحد مرمى على الأرض و بيصرخ انى دوسته
استغربت ازاى ممكن اخبط واحد بظهر العربية و انا ماشية للأمام
المهم، الشعب المصرى الشهم اتلم على الراجل و حرام عليكي و بتدوسوا الناس (افتكرت فيلم احمد حلمى اسف على الازعاج) و قلتلهم انا حوديه مستشفى اعلجه و كل واحد يروح لحاله (بصراحة خفت يتبلوا عليا و يلبسونى مصيبة)
فى العربية
ركبته العربية (و ده طبعا كان غلط جدا لأنه كان ممكن يسبتنى او يخطفنى أو اى حاجة )، الغريب انه كان رافض رفض فظيع انى اوديه مستشفى و فضل طول السكة يقولى ما تودينيش مستشفى (كأنى حسرق كليته) انت شاكلك بنت ناس و انا مش عايز ابهدلك عشان اهلى حيعملوا محضر و يبهدلوكى، رديت انى لو خبطك يبقى حعالجك، فضل يحلف بأمه المتوفيه ووالده المشلول و اخواته اللى بيصرف عليهم انى اسيبه يروح مستشفى لوحده و يعمل آشعة و اخد تليفونه و اطمن عليه (كل ده عشان ما يبهدلنيش حنين اوى)
سالته هو انا خبطك ازاى قالى حضرتك كسرتى عليا (حكسر ازاى بظهر العربية و انا ماشية للأمام يعنى لو برجع لورا تبقى منطقية) و بعدين قال انى دوست على مشط رجله و بعدين قال ان هو كان بيتفادى واحد فخبطه
قالى انه ما عهوش فلوس الآشعة فاتصل بصاحبه عشان يجيله بفلوس و تقريبا باس ايدي عشان انزله بحجة انه ما يبهدلنيش (طبعا مع الموقف و انه ما سكتش ثانية من ساعة ما ركب العربية و قعد يعيد و يزيد فى نفس الكلام و يصرخ من كتر الآلم و انا كل ده ما فهمتش انه عايز فلوس الآشعة و ينزل و ده راجع للضمير و التربية اللى اتربناها ان اللى يعمل حاجة يتحمل مسئوليتها و اننا ما ننامش و احنا ظالمين حد.......................... )
المهم فضل يقولى كتر خيريك و انت وقفتى و حد تانى كان جرى و فضل يعيد و يزيد فى نفس الجملتين و حاول يخوفنى و قالى انا كلمت صحبى و هو حيكلم اهلى و حيعملولك مشاكل كلام بدون توقف لدرجة انى قلتله اسكت شوية بدل ما اركب واحد تانى معانا
فى المستشفى
اول ما وصلنا عند المستشفى قالى سيبينى و امشى المهم طلبت كرسي بعجل و عشان انا والدى(ربنا يديه الصحة) دكتور فى المستشفى عرفت الناس بنفسى و اخذه عملوله اشعة
الحمد لله والدى وصل و عمله الآشعة و قالى ما عندوش فى رجله حتى خربوش و لا كدمة و لا ورمه و لا حاجة خالص انسان سليم 100% والدى قالى لو خبطه كان حيبقى فى كدمة و لو دوست على رجله بالعجلة كانت ورمت
المهم قال لوالدى ان ضاع منى 50 جنيه و انا واقع على الأرض و موباليى كان حيتسرق و انا سباك على باب الله و امى ..... و ابويا....
المهم والدى اداه فلوس غير فلوس الآشعة و كان عايز يجبله رباط ضاغط فرفض و وصله البيت و نزل من العربية بيعرج بعد لما كان واقع على الأرض و الناس شالته ركبته العربي (سبحان الله الآشعة كان فيها الشفه)
التكرار
علما بأن الموضوع ده اتكرر مع بنات كتير بتفاصيله (و ده اللى عرفته بعد اللى حصلى)
-مكان الحادث شارع جانبى فى منطقة راقية (خصوصا رشدى و كفر عبده)
-الضحية عادة بنت
-النصاب يرمى نفسه على ظهر العربية عشان ما تشوفهوش و عشان ما يتصابش
-عادة يكون متفق مع حد فى الشارع يقوم بدور ولاد البلد اللى بيلحقوه
كيفية التصرف
-ماحدش يركب حد معاه العربية مهما كان السبب ، اركن على جنب و كلم اى حد يجيلك
- اعمل عليه فيلم (انا بابا لواء و حتصل بيه يبعت بوكس يخدك و نروح القسم نعمل محضر بعد كده نطلع على المستشفى) حيقوم يمشي على رجليه زى الحصان
- لو ركبته اعرض عليه تروح بيه القسم يعمل محضر و بعد كده المستشفى
انا قررت اكون ايجابية و قلت مش حسكت على الى حصل
يا جماعة لازم نبعت الميل ده لكل الناس عشان
-الناس ديه شباب لازم يشتغلوا عشان يكسبوا
-الصدقة لازم تروح للى يستهلها
-لازم نحارب الفساد و النصب
- الناس ديه بتصرف فلوسها على القهاوى و المخدرات و البنات و يخده فلوسنا احنا اللى بنشتغل و نتعب فيها
عدل سابقا من قبل كلمات من نور في الأربعاء مايو 19, 2010 2:37 pm عدل 1 مرات
